Ishlatilgan iPhone tekshirish: olishdan oldin to'liq ro'yxat

Ochig'ini aytamiz: imkon bo'lsa, ishlatilgan telefon olmang. Lekin baribir qaror qilgan bo'lsangiz, ishlatilgan iPhone tekshirish uchun shu ro'yxatni oling: iCloud blokirovkasi, batareya, ta'mir tarixi, IMEI, ekran va hujjatlar — hammasi bosqichma-bosqich, Apple'ning rasmiy ko'rsatmalari asosida.

Ishlatilgan iPhone olish kerakmi?

Bizning javobimiz: ko'p hollarda yo'q, imkon doirasidagi eng yangi modelni olgan ma'qul. Sababi oddiy. Har yili yangi iOS va yangi ilovalar ko'proq operativ xotira, xotira va protsessor quvvatini talab qiladi. Eski model, ayniqsa kuchsizroq versiyasi, bu yukni ko'tara olmay, sekinlasha va qota boshlaydi.

Yangi funksiyalar ham eski modellarga yetib bormaydi. Masalan, iOS 27 eski iPhone'larda ham ishlaydi, lekin Apple Intelligence va yangi Siri faqat iPhone 15 Pro, 15 Pro Max va barcha iPhone 16 hamda undan keyingi modellarda mavjud (Apple). Ya'ni eski telefon olsangiz, yangi tizimni olasiz, lekin uning eng qiziq imkoniyatlarisiz.

Shu bilan birga, hamma narsa modelga bog'liq. Bir-ikki yillik iPhone yaxshi holatda va to'g'ri narxda bo'lsa, oqilona xarid bo'lishi mumkin. Shuning uchun ishlatilgan telefonni butunlay rad etmaymiz, faqat uni puxta tekshirib olishni tavsiya qilamiz.

Uchrashuvdan oldin nimani so'rash kerak?

Telefonni ko'rishga borishdan oldin sotuvchidan uchta narsani so'rang:

• IMEI va seriya raqami. Ular Sozlamalar → Umumiy → Ushbu qurilma haqida (Settings → General → About) bo'limida turadi (Apple). Shu bo'lim skrinshotini so'rang.
• Ta'mir bo'lganmi. Ekran, batareya yoki kamera almashtirilganmi, qayerda almashtirilgan.
• Qutisi va chek bormi. Quti ustidagi IMEI telefondagi bilan bir xil bo'lishi kerak.

IMEI'ni olgach, uni uzimei.uz saytida tekshiring: telefon O'zbekistonda ro'yxatdan o'tganmi yoki yo'q. Seriya raqamini esa Apple'ning kafolat tekshiruvi sahifasiga kiriting — u qurilmaning kafolat holatini ko'rsatadi. Sotuvchi bu ma'lumotlarni berishdan bosh tortsa, bu birinchi ogohlantirish belgisi.

Uchrashuvni kunduzi, gavjum va xavfsiz joyda belgilang. O'zingiz bilan zaryadlovchi kabel, SIM-karta va quloqchin oling.

1-qadam: iCloud blokirovkasini (Activation Lock) tekshiring

Bu eng muhim qadam: iCloud'ga bog'langan telefon sizga g'isht bo'lib qolishi mumkin. Apple ko'rsatmasiga ko'ra, quyidagicha tekshiriladi:

• Yoqilganda «iPhone Locked to Owner» (egasiga bog'langan) degan ekran chiqsa — telefonni olmang.
• Parol so'raydigan qulf ekrani yoki asosiy ekran chiqsa — sotuvchi telefonni tozalamagan. Uni sizning ko'z oldingizda tozalashini so'rang.
• Sozlash paytida oldingi egasining Apple akkaunti va paroli so'ralsa — telefon hali uning akkauntiga bog'langan. Egasi parolni kiritishi yoki akkauntidan qurilmani o'chirishi shart.
• Telefon «Hello» (Salom) ekrani bilan ochilsa — u yangi egaga tayyor.

Amalda eng ishonchli yo'l: sotuvchi sizning oldingizda Apple akkauntidan chiqadi va barcha kontent hamda sozlamalarni o'chiradi. Keyin telefonni o'zingiz noldan sozlay boshlaysiz. Shundan keyingina to'lov haqida gaplashing.

2-qadam: batareya holatini ko'ring

Batareya holati Sozlamalar → Batareya → Batareya holati (Battery Health) bo'limida ko'rinadi (Apple). «Maksimal sig'im» batareyaning yangi paytidagiga nisbatan qancha quvvat saqlashini ko'rsatadi.

Apple ma'lumotiga ko'ra, iPhone 14 va undan eski modellar ideal sharoitda 500 ta to'liq zaryad siklida, iPhone 15 va yangilari esa 1000 siklda dastlabki sig'imning 80% ini saqlashga mo'ljallangan. Sig'im 80% atrofida yoki undan past bo'lsa, yaqin orada batareya almashtirishga pul ajratishingizga to'g'ri keladi — buni narxda hisobga oling.

Shu sahifadagi ogohlantirishlarga alohida qarang:

• «Batareya holati sezilarli yomonlashgan» — batareyani almashtirish kerak.
• «Asl Apple batareyasi ekanini tasdiqlab bo'lmadi» — batareya asl emas yoki tekshirib bo'lmaydi, ko'rsatilgan foiz ham noto'g'ri bo'lishi mumkin.
• «Unumdorlik boshqaruvi qo'llanilgan» — telefon kutilmaganda o'chib qolgan va iOS uni sekinlashtirgan.

3-qadam: ehtiyot qismlar va ta'mir tarixi

Telefon ta'mirlangan bo'lsa, buni Sozlamalar → Umumiy → Ushbu qurilma haqida bo'limidagi «Parts and Service History» (ehtiyot qismlar va xizmat tarixi) qismida ko'rasiz. Bu iOS 15.2 va undan yangi versiyalarda ishlaydi, iPhone 12 va yangilarida batareya, ekran, ona plata (Logic Board), old va orqa kameralarni qamrab oladi (Apple).

Bu bo'lim umuman ko'rinmasa, tizimda ta'mir qayd etilmagan degani. Lekin baribir 5-qadamdagi tashqi tekshiruvni o'tkazib yubormang.

4-qadam: IMEI va seriya raqamini solishtiring

IMEI uch joyda bir xil bo'lishi kerak: Sozlamalarda, qutida va (iPhone 6s dan iPhone 13 gacha bo'lgan ko'p modellarda) SIM-karta lotogida. iPhone 14 va undan yangi modellarda IMEI korpusga o'yib yozilmaydi (Apple). IMEI'ni *#06# terib ham bilish mumkin.

IMEI'ni uzimei.uz da yana bir bor, endi telefon qo'lingizda turganida tekshiring. Ro'yxatdan o'tmagan bo'lsa, buni oldindan bilib, narx va keyingi harakatlarni sotuvchi bilan kelishib oling.

Belgi har doim ham dalil emas: bir voqea

Ba'zan shubha noto'g'ri joyga olib boradi. Bir do'konda shunday holat bo'lgan. Do'kon endi ochilgan payt edi (Redmi Note 8–10 chiqayotgan davr), mijoz u yerdan yangi telefon sotib oldi. Do'kon egalaridan birining raqami Google Business'da do'kon nomi bilan ro'yxatdan o'tgan edi. Mijoz uyda telefonni qutidan chiqarib, internetga ulab, Google akkauntiga kirdi va shu raqamga qo'ng'iroq qildi. Telefon raqamni avtomatik ravishda do'kon nomi bilan ko'rsatdi — xuddi kontaktlarda saqlangandek.

Mijoz jahl bilan qaytib keldi: «Menga ishlatilgan telefon sotgansiz». Do'kon sababini topib, tushuntirdi, baribir telefonni 100 ming so'm arzonroqqa, foydasiz berdi. Bu voqeadan saboq: taxmin bilan emas, aniq vositalar bilan tekshiring. Ehtiyot qismlar tarixi, batareya sikli, kafolat holati — bularni yolg'on gapirtirib bo'lmaydi.

5-qadam: ekran, kamera, tugmalar va namlik

Tizim tekshiruvidan keyin qurilmaning o'zini 10 daqiqa sinang:

1. Ekran. Oq va qora fonda dog', o'lik piksel, rang og'ishi bormi. Ilova belgisini barmoq bilan butun ekran bo'ylab sudrab, sensor hamma joyda ishlashini tekshiring.
2. Face ID. Yangi yuz qo'shib ko'ring, qulf bir necha marta ochilsin.
3. Kameralar. Har bir linzaga o'tib suratga oling, video yozing, old kamerani ham sinang. Fokus va chiroqni tekshiring.
4. Ovoz va mikrofon. O'z SIM-kartangiz bilan qo'ng'iroq qiling, karnay rejimini yoqing, ovozli yozuv qilib eshiting.
5. Tugmalar va zaryad. Ovoz, yon tugma, ovozsiz rejim yoki Action tugmasi, tebranish. Kabel bilan zaryadga qo'yib, quvvat olayotganini ko'ring.
6. Aloqa. Wi-Fi, Bluetooth, mobil internet ishlayaptimi.
7. Korpus. Egilish, chuqurcha, ekran va ramka orasidagi tirqish — telefon ochilganining belgisi bo'lishi mumkin.

Namlikni ham tekshiring. iPhone ichida suyuqlik indikatori bor: odatda oq yoki kumushrang, suv tegsa butunlay qizil bo'ladi. Uning joyi modelga qarab farq qiladi, faqat eSIM'li ba'zi versiyalarda tashqaridan ko'rinmaydi. Suyuqlik bilan bog'liq shikastlanish Apple'ning bir yillik cheklangan kafolatiga kirmaydi (Apple).

6-qadam: hujjat va kelishuvni yozma qiling

Hammasi joyida bo'lsa, kelishuvni yozib qo'ying. Odamlar orasidagi munosabatni buzadigan eng katta xato — ochiq kelishmaslik. Shuning uchun sotuvchining ismi, telefon raqami, qurilma IMEI'si, narx, sana va «nima ta'mirlangan» degan javobini yozma qayd eting — qog'ozda yoki hech bo'lmasa Telegram yozishmasida (u yerda xabar tahrir qilinsa, ko'rinib turadi). Quti, chek va zaryadlovchi bo'lsa, birga oling.

Oldindan to'lov qilmang. Pulni faqat telefon tozalanib, sizning akkauntingiz bilan sozlangandan keyin bering.

Xulosa

Bizning tavsiyamiz o'zgarmaydi: imkon bo'lsa, ishlatilgan iPhone emas, byudjetingizdagi eng yangi modelni oling. Ba'zan yangi telefon ishlatilgan flagman narxiga yaqin turadi — smartfonlar katalogimizda buni tez solishtirish mumkin. Baribir ishlatilgan iPhone olsangiz, shoshilmang: iCloud blokirovkasi, batareya, ta'mir tarixi, IMEI va tashqi holatni tekshirish 15–20 daqiqa oladi. Sotuvchi tekshiruvga qarshi bo'lsa, xayrlashing — bu eng arzon saboq.

Yangi modellar narxini MaxProfit'da solishtirib ko'rishingiz yoki Telegram botda narx kuzatuvini yoqib, narx tushganda xabar olishingiz mumkin.